Rom 1 | MNA | STEP | Nio Paulus ta aŋbeede ro ti. Nio mbesooŋo ki Yesu Krisi. Ni itunu ta ipeikat yo, mi iboobo yo ma aŋwe ŋgoŋana kini. Tanata aŋzzoyaryaara uruunu ambaiŋana ki Anutu.

aŊgo 9:15; Ga 1:15

bLu 24:25+; Yo 5:39; Ro 16:25+

cMt 1:1+; Ibr 1:5

dŊgo 26:16+; Ro 16:26; 1Kor 15:9+; Ga 1:15+

e1Kor 1:2+; Ga 1:3

fRo 16:19; Kol 1:3+

g1Tes 3:10; 2Tim 1:3

hRo 12:6+; 1Kor 12:7+

iIbr 10:24

jRo 15:22+

k1Kor 9:16

lMk 8:38; Ŋgo 3:26, 13:46; Ro 5:9+; 1Kor 1:18+; 2Tim 1:8

nHab 2:4; Ro 3:21+; Ga 3:11; Pil 3:9

oMbo 7:11; Yo 3:36; Ep 5:6; Kol 3:6

pMbo 19:1+; Ŋgo 14:17+

qUn 8:21; Ep 4:17+

r1Kor 1:20,27, 3:18+

sLo 4:16+; Mbo 106:20; Ŋgo 17:29

tMbo 81:12; 1Kor 6:18; Ep 4:18+; 1Pe 4:3

u1Tes 1:9; 2Tes 2:10; 1Yo 5:20

vWkp 18:22+; Ep 5:11+

wUn 19:5; 1Kor 6:9,18; 1Tes 4:4+

xRo 1:22

yGa 5:19+

zMbo 50:18; Ro 6:21,23

Romans 1

1 Nio Paulus ta aŋbeede ro ti. Nio mbesooŋo ki Yesu Krisi. Ni itunu ta ipeikat yo, mi iboobo yo ma aŋwe ŋgoŋana kini. Tanata aŋzzoyaryaara uruunu ambaiŋana ki Anutu. ^a

2 Uruunu ambaiŋana tiŋgi, ni imbuk sua pa, mi ipatooŋo la ki kwoono bizin, ma tibeede se ro kini potomŋana ta muŋgu kek. ^b

3 Mi ina iso pa Lutuunu Yesu Krisi. Ni Merere kiti. Indeeŋe ta tipeebi ma isu iwe tomtom na, ni popoŋana ki Dabit. Mi indeeŋe ta burup ma imaŋga pa naala, ina iswe kat ta kembei: Ni Anutu Lutuunu mburaanaŋana, mi ni potomŋana kembei Anutu itunu. ^c

5 Mi nio na, Yesu Krisi ikampe yo mi iur yo ma aŋwe ŋgoŋana kini, bekena aŋkam zin karkari ta boozomen ta Yuda somŋan i ma tiurla kini mi tito i. Naso aŋkam zin ma tipakur ni zaana. ^d

6 Mi sua tiŋgi indeeŋe yom Rom koyom tomini. Pa Anutu iboobo yom ma kewe Krisi lene kek.

7 Tana niom Rom koyom ta Anutu iur leleene piom, mi iboobo yom ma kewe wal kini potomŋan kek na, nio aŋbeede ro tiŋgi ima piom ta boozomen.

Tamanda Anutu mi Merere kiti Yesu Krisi ko tikampe yom, mi timboro yom ma kombot ambai. Ŋonoono. ^e

Paulus leleene be ila mi ire zin Rom kan

8 Sua tio mataana kana, ina ta kembei: Niom ta boozomen tana kakam yo ma leleŋ ambai kat, mi aŋpakur Anutu tio pa Yesu Krisi zaana. Pa urlaŋana tiom uruunu tizzo ma irao lele ta boozomen kek. ^f

9 Anutu ta aŋur leleŋ imap ila kini, mi aŋbesmbeeze pini, mi aŋzzoyaryaara uruunu ambaiŋana ki Lutuunu na, ni iute ta kembei: Nio motoŋ iŋgalŋgal yom pa suŋŋana tio totomen. Mi iŋgi aŋzuŋzuŋi beso parei na, itunu iur leŋ zaala sa be aŋma mi aŋre yom. ^g

11 Pa leleŋ ilip be aŋre yom mi aŋpombol yom pa koroŋ ambaimbaiŋan pakan ta ki Bubuŋana i. ^h

12 Mi niom tomini ko kopombol yo. Naso itiŋan taparpombol ti pa urlaŋana kiti. ⁱ

13 O niom toŋmatiziŋ tio, nio leleŋ be kuute kat ta kembei: Ta muŋgu mi imar na, leleŋ be aŋma mi aŋre yom. Pa aŋso aŋre uraata tio iur ŋonoono pakan ila mazwoyom tomini, kembei ta aŋre su lele pakan kizin wal ta Yuda somŋan i. Tamen mazwaana boozomen ta aŋmaŋga be aŋma, na som. Koroŋ pakan ipakalkaala yo. Tabe ikamam ma aŋma aŋre yom som. ^j

14 Pa nio ti, aŋyamaana kembei mbun tio biibi imbotmbot men i. Paso Anutu, ni ikampe yo mi imuŋai yo biibi. Tana aŋso aŋkam uraata pizin wal ta boozomen, bekena aŋpokot mbun tio tana. Zin Grik, mi zin wal ta Grik somŋan i tomini. Mi zin ŋgarŋan, mi zin wal ta len ŋgar somŋan i tomini. ^k

15 Uunu tina ta aŋkam siliigi be aŋma mi aŋsoyaara uruunu ambaiŋana piom wal ta kombot Rom na tomini.

Uruunu ambaiŋana iswe zaala tabe tewe ndeeŋeŋanda pa Anutu mataana

16 Nio ti, koŋ miaŋ pa uruunu ambaiŋana som. Pa ina zaala tau Anutu izzwe mburaana pizin wal boozomen ta tiurla na, mi ikamkewe zin ma timbot ambai. Mataana mi ikam pizin Yuda muŋgu. Mana ikam pizin wal ta Yuda somŋan i tomini. ^l

17 Pa uruunu ambaiŋana, ta izzwe zaala tau Anutu ikam ti ma tewe ndeeŋeŋanda pa ni mataana. ^{▼▼(1:17) Zin wal ta tiwe ndeeŋeŋan pa Anutu mataana na, Anutu ire zin kembei len uunu sa tabe ni iur kadoono pizin pa i na som. Tana sombe mbeŋ kaimer ipet mi ni itiiri zin pa mbulu kizin, inako iso pizin ta kembei: “Niom tina, Lutuŋ ikam yom ma kewe ndeeŋeŋoyom kek. Tana nio irao aŋur kadoono sa piom na som.”} Zaala tana ki urlaŋana men. Kembei ta sua ki Merere ta tibeede pataaŋa kek na isombe:

Tomtom ta so iurla, nako iwe ndeeŋeŋana mi ikam mbotŋana ta ki Anutu i. ⁿ

Anutu kete malmalŋana kini izze kizin tomtom pa sanaana kizin

18 Anutu ta imbot saamba a, ni izzwe kete malmalŋana kini pizin wal boozomen ta titoto mbulu kini som. Mi zin wal tau tikamam mbulu bozboozo ta indeeŋe som, mi tipakalkaala sua ŋonoono pa mbulu kizin sananŋan na, ni iurur kadoono pizin. ^o

19 Mi sombe Anutu iur kadoono pizin, na len sua sa som. Pa ni ipaute zin tomtom pa mbulu kini pakan ma timbot mat pa kek. Ŋonoono, tomtom tire i som. Tamen indeeŋe tau ni iur saamba ma toono mi imar na, tirre zin koroŋ ta ni iur na. Mi nama muriini tana ipaute zin pa mbulu kini pakan kek. Mbulu ta kembei: Ni mburaana biibi, mi mburaana tana ko imbotmbot ma alok. Mi ni ipa ndel kat piti tomtom mi koroŋ ta boozomen. Pa ni Anutu tau. ^p

21 Pa tomtom ta boozomen tiute lup. Anutu, ni imbotmbot. Tamen tipakuri som, tipou i som. Mi lelen ambai pini pa kampeŋana kini som, mi tikamam ŋgar pa koroŋ soroksorok ta ŋonoono somŋana i. Tanata ŋgar kizin ikankaana lup, mi matan imun pa koroŋ ki Anutu. ^q

22 Zitun tiso zin len ŋgar biibi. Tamen zin kankaanaŋan kat. ^r

23 Pa Anutu ŋonoono ta zaana biibi, mi mburaana biibi, mi imbotmbot ma alok i, na tipizil ndemen pini, mi lelen be timbeeze pini som. Mi tisu mi timbesmbeeze pa koroŋ soroksorok ta zitun tiurpe pa naman na, ma iwe tomtom, som man, som mbili, som koroŋ karraŋan ruŋgun. Tana koroŋ tabe loŋa men mi isaana i, ta zin tiso timbeeze pa. ^s

24 Uunu tina ta Anutu izem zin ma tikam mbulu irao zitun lelen mi ŋgar kizin sananŋana. Tana tikamam mbulu ki me ma ŋge ta iŋgeeze som na, mi tiparpamiaŋ zitun. ^t

25 Paso, tipizil ndemen pa sua ŋonoono ki Anutu, mi lelen pa ŋgar pakaamŋana ilip, mi timbesmbeeze pa zin koroŋ ta Anutu iur zin na, mi tipakurkur zin. Mi ni ta iur zin koroŋ tana ma tipet na, tipakuri som, mi timbeeze pini som. Mi iti, nako lelende ambai pini mi tapakuri pa kampeŋana kini totomen. Ŋonoono. ^u

26 Tana zin tipizil ndemen pa Anutu, mi ni izem zin ma timbot la tuntunŋana ki kulin be tikam mbulu ta pamiaŋŋana biibi na. Mbulu kizin irao ŋgar sa som. Pa zin moori tizem mbulu ki ula, mi ziŋan zin moori pakan tikenne. ^v

27 Mi zin tomooto ta kembena. Tuntunŋana ise pizin, to tizem mbulu ki ula, mi ziŋan zin tomooto pakan tikenne. Tana tipa ŋoobo pa zaala ki Anutu, mi mbulu sananŋana ta tiparkamam pizin ta iwe len kadoono. Mi ina indeeŋe men. ^w

28 Zin lelen be tikam ŋgar pa Anutu som, tanata izem zin ma ŋgar kizin italli kat, mi tikamam mbulu ta irao ŋgar sa som. ^x

29 Tere zin na, kembei zin bok pa mbulu sananŋan matakiŋa boozomen ta ambai som kat. Pa tikamam mbulu kizin me ma ŋge i. Mi matan koroŋŋan kat. Tiurur koi pizin tomtom. Matan mburmbur. Titekteege siŋ pizin tomtom. Tiparzorzooro. Tipakamkaam. Tikamam ŋgar sananŋana pizin tomtom. Tininin kao. ^y

30 Tiŋgalŋgal sua. Tiurur koi pa Anutu. Matan repilpiili zin tomtom mi tikototo zin. Tipakurkur zitun. Tiwidit zitun urun. Matan rru mbulu sananŋan ta popoŋan i be tikam. Mi tizorzooro pa taman ma nan bizin. 31 Tana tikankaana kat. Mi sua kizin na, irao tendemeere na som. Mi tiurur lelen pizin toŋmatiziŋ kizin som, mi timuŋaiŋai tomtom sa som. 32 Mi zin tiute: Anutu iur sua pataaŋa kek ta kembei: Wal ta so tikamam mbulu ta kembei, ina ambai be timetmeete ma tila len. Tamen tinoknok men. Mi so wal pakan tikam ta kembei tomini, to zin lelen ambai pizin mi tipombol zin. ^z